'Ndondó

Pauliddru o paisi dava 'u cumunicatu,

Ndondó, cu na lanna ci stava allatu.

Tammuriannu, Pauliddru dava l'avvisi

cu iddru, Ndondó si firriava tutt'u paisi.

 

'Na coppula, 'na bunaca, 'na cammisa,

un paru di canzi 'i villutu era a so divisa.

"Papà me, mamà toí." Ci 'a fidava a diri;

da so casa pu paisi sapiva iri e viniri.

 

Ni tutti 'i funerali era sempri prisenti,

prontu a dari 'a mani a tutti 'i parenti.

A tutti 'i manifestazioni participava,

ni tutti 'i festi e zitaggi si ci truvava.

 

'U maistru Mauriziu ci fici un ritrattu,

ca ancora o municipiu si trova 'ntattu,

cu l'occhi ca pari taliari tuttu e nenti,

ni vonnu diri: "Sugnu sempri prisenti."

(Pino Bullara)